 |  |
 |
Nick: Trouble
Oggetto: alla pomiglianese
Data: 2/6/2006 11.33.11
Visite: 33
Stu sabbato se chiamma alleracòre
A chi la tene la mugliera bella
E a chi la tene brutta se dispera
Che bellu suono tene stu tammurro
Nisciun' 'o tuculéa e chillo sona
Uh quant'è àveto stu palazzo
Quanto song'ariose chelli ffeneste
Ce sta na nenna ca sempe s'affaccia
C' 'e vvo' arracqua' 'e garuofene alla testa
I’ m'avutaie - vottamìnne uno -
E chella m' 'o menaie nu rammaglietto
Nu rammaglietto a mme manco m'avasta
Nce voglio a Cuncettella cu tutt' 'a testa
Auciello r' 'o mio cumanno
Ih comme te ne vai cimma cimma
Nisciuno te spia e i' manco t'addimanno
Manco te voglio lu bbene re primma
Vulimmo j' 'a parte d'Avetrano
Jamm' 'o Saveratore ch'è cchiù bbicino
Quanno nce simmo ncopp'a chellu chiano
M'avoto arreto e bbeco a nenna mia
- Nc'hè juto 'a festa no' mm'haie purtato
Ca n'atu guappetiello t'ha purtato -
- Avanza lu pére si vuo' cumpagnia
Sola m'ha fatto mamma, sola aggi' 'a ire -
Bella figliola si vuoi essere vasata
Pigliai' 'a palettella e bba p' 'o ffuoco
Tu po' te crire ca chille so' vvase
Nun saie ca so' stizzech' 'e fuoco
Rosa rusella nun me veni' nzuonno
Nun me venite lu suonno a rubbare
Nun t'avastava l'ammore r' 'o juorno
Pure stasera (me viene a 'ncuitare)
Roi' ruselle ncopp'a una pianta
Nce simmo aunite rui' còre cuntiente
E i' nce porto roi' sacche vacante
E nce ne porto tre e senza niente
Bella figliola ch'é sabbato ogge
Fatte la capa ca è festa rimane
'E ricciulille t' 'e spìcceche ogge
Li 'ncavatielle t' 'e ffaie rimane
- Bella figliola comme ve chiammate? -
- Me chiammo sanacòre e che bbulite! -
- Sanatammill' 'o còre si putite
Si nun putite vuie m' 'o sana n'ata -
Voglio sapere che permesso avite
Chest'arma proibbita voie purtate
M'ato sparato no' mm'aite curpito
Cu ddoi' pallucce d'oro caricate
Ammore mio fattili' 'o tavuto
e 'a rinto te ce miette fravecato
'Ncapo re n'anno te vengo a rraprire
Sango r' 'o primm'ammore cerca piatate
- Bella figliola cu sti ddoi' percòche
Ramménne un'a mme so' nnammurato -
- Nun te ne rongo una e mmanco mèza
Mammèlla me nce ha mmis' 'o 'uardiano
So' piccerelle e sso' acèvere ancora
Viénece quanno s'hanno mmaturate -
Bella figliola cu stu ffuoco sotto
Quanno cammine pare na zagante
Ca 'mpietto a bbuie nc'é nnata na fonte
'O Papa ce ha beneritto cu ll’acqua santa
Chi s' 'o bbo' vévere st'acqua re sta fonte
Ce hadda purta' 'e zecchine e diamante
'E zecchenielle micie so' ssempe pronte
Chest'acqua m'aggi' 'a vévere o mòro o campo
